Во Швајцарија ќе се гради футуристички стадион со ролеркостер

Новата арена, наречена „Сервен Колосеум“, ќе има капацитет од 15.000 гледачи и е дел од амбициозниот проект „Сион 2030“. Вкупната инвестиција се проценува на околу 450 милиони швајцарски франци, односно приближно 492 милиони евра.

Стадионот треба да го замени историскиот „Турбион“, домот на Сион од 1968 година. Новиот комплекс е замислен не само како фудбалски стадион, туку и како туристички и забавен центар кој ќе функционира во текот на целата година. Најголемо внимание привлекува ролеркостерот, кој ќе биде интегриран во структурата на објектот. Атракцијата ќе се протега околу трибините и по надворешниот дел од комплексот, овозможувајќи им на посетителите да уживаат во адреналинско возење со поглед кон теренот и Алпите.

Архитектонскиот концепт е инспириран од планинскиот пејзаж околу Сион, а целта е новиот комплекс да стане една од главните туристички атракции во регионот. Проектот веќе е доставен до кантоналните и локалните власти за првата фаза од техничката проценка и проверката на изводливоста. Јавната расправа се очекува во средината на 2027 година, по што би можело да започне изградбата.

Доколку плановите се реализираат според предвиденото, Сион ќе добие стадион каков што ретко се среќава во светот – место каде што фудбалот, туризмот и забавата ќе бидат споени во еден комплекс.