Нова магија на Јокиќ - подели историска асистенција зад грб низ тројца кошаркари на Јута!

И покрај поразот на својот тим, српскиот центар повторно беше во центарот на вниманието, благодарение на неговата нестварна кошаркарска визија која резултираше со потег на вечерта. Ремек-делото на теренот се случи во моментот кога Јокиќ ја прими топката додека одбраната на Јута беше густо поставена долж основната линија. Со неверојатно чувство за простор, тој испрати додавање зад грб кое буквално помина низ тројца противнички кошаркари. Топката стигна директно во рацете на Камерон Џонсон, кој беше позициониран во десниот агол од теренот, по што следеше прецизен шут за три поени.

Стручниот штаб на Денвер очекувано го штедеше својот најдобар кошаркар во овој подготвителен дуел. Српскиот центар помина само 14 минути на паркетот, но и тој краток период му беше сосема доволен за да го диктира темпото на играта, запишувајќи учинок од три поени, три скока и дури седум асистенции.