Ѓоковиќ со сензационален пресврт го преслуша Зверев – сѐ уште е без пораз во Пекинг!
Ова е негова 32-ра победа по ред на турнирот во кинеската престолнина, каде што никогаш нема загубено, како и десетта победа во 15-ти меѓусебен дуел против германскиот тенисер. На патот кон ново финале, Ѓоковиќ ќе се соочи со уште еден стар познаник, рускиот претставник Данил Медведев.
Натпреварот не започна според посакуваното сценарио за Ѓоковиќ, бидејќи Зверев веднаш направи брејк и поведе со 2-0, предност која се покажа како клучна за освојување на првиот сет. Сепак, она што можеше да ги охрабри фановите на Ѓоковиќ беше фактот дека тој овојпат на теренот делуваше значително посвежо и физички поподготвено, за разлика од некои претходни мечеви каде што јавно објаснуваше дека се соочува со здравствени проблеми. Враќањето на ритамот дојде до израз во вториот сет каде што се водеше целосно израмнета битка сè до самиот финиш. При крајот на сетот, српскиот тенисер го направи својот прв брејк на мечот, искористувајќи ја првата сет-топка за израмнување на резултатот.
Решавачкиот трет сет донесе вистинска драма во која двајцата тенисери сигурно ги освојуваа своите сервис-гемови. При водство од 5-4 за Ѓоковиќ, Зверев се најде под огромен психолошки притисок при својот почетен удар. Србинот се обиде да го искористи тоа и стигна до првата меч-топка, по што следуваше еден од најдолгите поени на натпреварот со дури 27 разменети удари. Откако Ѓоковиќ го испрати 27-от удар во аут, Германецот успеа привремено да се спаси и дури да стигне до гем-топка. Сепак, Ѓоковиќ експресно израмни, а потоа дочека неизнудена грешка на противникот за нова, втора меч-топка. Овојпат српскиот тенисер беше прецизен, ставајќи точка на маратонскиот дуел за пласман во полуфиналето.
ФОТО: X / @KalshiTen