Скандал во Пекинг: Ѓоковиќ збесна откако судијата му подари изгубен поен на Зверев (ВИДЕО)

Ситуацијата ескалираше при резултат 1-0 за Зверев и 30-30. Откако германскиот тенисер го изведе почетниот удар, Ѓоковиќ успешно возврати, а по кратка размена на удари, Германецот го загуби поенот. Меѓутоа, наместо да се помири со епилогот на теренот, тој ја застана играта и побара проверка од судијата, сметајќи дека за време на размената дошло до надворешно попречување.

На Ѓоковиќ воопшто не му се допадна ваквата одлука, па веднаш се упати кон судиското столче за да праша зошто смета дека поенот не треба да се преигрува. Српскиот тенисер инсистираше на правилото дека играчот кој е попречен мора веднаш да реагира и да го прекине поенот во моментот кога попречувањето ќе се случи, а не откако ќе ја загуби размената. Иако Зверев пријде да ја објасни својата страна од приказната, популарниот Ноле не отстапуваше од својот став и отворено го критикуваше начинот на кој судијата ја протолкува целата ситуација.

„Тој сервираше, јас вратив... Ако му пречело нешто, ќе застанеше по сервисот. Ова нема никаква смисла. Ова е најглупавото толкување на правилата во мојот живот. Нема смисла. Ако играчот забележи пречење, тој веднаш застанува. Ние можеме да одиграме размена од 30 удари, и ако го загуби поенот, тој може да застане“, порача видно изнервираниот Ѓоковиќ.

И покрај силните аргументи на освојувачот на 24 грен слем титули, главниот судија не ја промени својата одлука и остана на ставот дека поенот мора да се повтори, доделувајќи му го на Зверев она што го бараше. На крајот, Новак само одмавна со главата и со иронична насмевка се упати кон своето место за да го продолжи натпреварот. Оваа спорна ситуација во раната фаза од мечот дополнително ја подгреа атмосферата на теренот, каде Ѓоковиќ се обидуваше да го пронајде својот ритам во големата битка за пласман во полуфиналето на турнирот во кинеската престолнина.

Зверев иначе го доби првиот сет со 6-4.