Дволичноста на Роналдо - едно зборуваше минатата недела, друго направи синоќа (ВИДЕО)

Случувањата добиваат дополнителна тежина ако се споредат со зборовите на Роналдо дадени во интервју за РТП само неколку дена претходно.

Тогаш капитенот на Португалија јавно порача дека нема проблем доколку селекторот одлучи да го остави на клупата.

„Ако селекторот одлучи дека најдоброто за тимот е да почнам од клупата, тоа совршено го прифаќам. Тука сум да ѝ помогнам на репрезентацијата за сè што е потребно. Ако не влезам, исто така нема проблем. Најважно е тимот да победи и групата да биде обединета“, изјави Роналдо.

Во истото интервју тој дополнително нагласи дека колективот мора да биде над индивидуалниот интерес.

„Најважен е колективот и Португалија да успее да ги добие натпреварите. Секогаш сум велел дека групата е над секој играч и целосно сум достапен да ја извршувам улогата која ќе ми биде доделена.“

Само неколку дена подоцна, ситуацијата во Копенхаген изгледаше сосема поинаку. Жезус на прес-конференцијата пред натпреварот со Данска потврди дека Рамос во принцип ќе биде во стартниот состав, додека за Роналдо остави можност да влезе или да не влезе во игра.

„Во принцип, Гонсало Рамос ќе игра. За Роналдо не знам дали ќе влезе или не. Не знам што ќе се случи утре. Ако ми треба, ќе влезе, ако не ми треба, нема да влезе. Статусот не значи дека играчите треба да се разликуваат од останатите“, порача селекторот.

Жезус дополнително ја нагласи својата позиција како тренер.

„Статусот значи почит кон нивната кариера. Јас секогаш го разгледувам планот што го имам со играчот, но јас одлучувам. Тие го знаат тоа. Во клубот одлучува претседателот, во тимот одлучувам јас.“

По прес-конференцијата, Роналдо не се појави на тренингот. Наместо тоа, го напушти стадионот „Паркен“, а потоа се упати кон аеродромот во Копенхаген. Неговото однесување предизвика земјотрес во португалската репрезентација, а дополнително подгреа шпекулации дека тука е крајот на репрезентативната кариера на фудбалерот на Ал Наср.