Роналдо сега се соочува и со шестмесечна суспензија

01 октомври 2026 - 09:55

Кристијано Роналдо се соочува со можност за сериозна дисциплинска санкција откако го напушти кампот на португалската репрезентација во Копенхаген, во пресрет на натпреварот против Данска во Лигата на нациите.

Според дисциплинскиот правилник на Португалската фудбалска федерација, играч кој е уредно повикан, а неоправдано ќе го напушти или нема да се појави на тренинг, натпревар или друга активност поврзана со репрезентацијата, може да биде казнет со суспензија од еден до шест месеци.

Покрај суспензијата, за професионален фудбалер е предвидена и парична казна од 5 до 10 единици, што според актуелната вредност изнесува приближно 500 до 1.000 евра. Правилникот предвидува и автоматска превентивна суспензија во случај на неоправдано отсуство или напуштање на репрезентативниот собир. Случајот доаѓа по неколкудневна напнатост околу капитенот на Португалија. Роналдо беше стартер во победата над Велс со 1-0, но остана на клупата во триумфот над Норвешка со 2-1. По тој натпревар, 41-годишниот напаѓач го напушти теренот без да им се придружи на соиграчите во поздравот со португалските навивачи.

Во следните денови тој не тренираше со останатите репрезентативци, а ситуацијата дополнително се заостри во Копенхаген. Селекторот Жорже Жезус пред тренингот изјави дека Роналдо не одбил да тренира и дека очекува тој да се појави на теренот.

„Роналдо не одби да тренира. Тоа беше невозможно“, порача Жезус.

Сепак, Роналдо потоа го напушти стадионот, а подоцна преку социјалните мрежи потврди дека донел одлука да го напушти репрезентативниот камп.

„По прес-конференцијата на селекторот и по разговорот со претседателот на Португалската фудбалска федерација, донесов одлука да го напуштам кампот на репрезентацијата. Во свое време ќе им ја кажам вистината на сите Португалци за причините кои ме натераа да си заминам“, објави Роналдо.

Португалската федерација потврди дека фудбалерот го напуштил кампот, но соопшти дека подготовките за натпреварите против Данска и Норвешка ќе продолжат според планот со преостанатите 24 репрезентативци. Во моментов, клучно прашање е дали неговото напуштање ќе биде оценето како неоправдано отсуство. Доколку дисциплинските органи утврдат прекршок според член 160 од правилникот, Роналдо може да се соочи со суспензија од еден до шест месеци, како и со парична казна.

Случајот дополнително ја зголеми неизвесноста околу иднината на Роналдо во репрезентацијата. Португалецот е рекордер по бројот на настапи и голови за националниот тим, со 234 репрезентативни настапи и 146 гола, а со Португалија ги освои Европското првенство во 2016 и Лигата на нациите во 2019 и 2025 година.