Шпанија и Мароко заедно ќе органираат Мундијал, а веќе влегоа во „војна“ за финалето

Мундијалот во 2030 година ќе го организираат Шпанија, Португалија и Мароко, но сè уште нема конечна одлука каде ќе се одигра финалето.

Шпанија досега важеше за фаворит за домаќин на завршниот натпревар. Во игра е стадионот „Сантијаго Бернабеу“ во Мадрид, а како можна опција се споменува и реновираниот „Камп Ноу“ во Барселона. Од друга страна, Мароко во последниот период води сериозна дипломатска и спортска офанзива за да го добие финалето. Според информациите што се појавуваат во медиумите, мароканската страна дури лобира и преку американскиот претседател Доналд Трамп.

Се појавија и шпекулации дека претседателот на ФИФА, Џани Инфантино, наводно ветил финале на Мароко доколку добие поддршка за нов мандат, но за ваквите тврдења нема официјална потврда. Мароканците вчера отидоа чекор подалеку и јавно соопштија дека веќе го добиле финалето.

„Градот Бенслиман ќе биде домаќин на финалето на Светското првенство. Може да ви се допаѓа или да не ви се допаѓа, а ако некој сака да зборува за тоа, нека зборува. Градот Бенслиман, стадионот Хасан II и се надевам дека Мароко ќе игра во тоа финале“, изјави претседателот на Фудбалскиот сојуз на Мароко, Фузи Лакја.

Сепак, ФИФА веднаш стави до знаење дека конечната одлука не е донесена. Портпаролот на светската фудбалска организација порача дека „одлуката ќе биде донесена наскоро“. Мароко во меѓувреме го подготвува спектакуларниот стадион „Хасан II“ во близина на Казабланка. Објектот сè уште е во изградба, а кога ќе биде завршен, треба да има капацитет од околу 115.000 гледачи и да стане најголемиот стадион во светот.

Така, битката за финалето на Мундијалот 2030 продолжува. Шпанија не се откажува од својата кандидатура, додека Мароко има амбициозен проект и огромен стадион во изградба.