Неверојатна традиција: Бразил вечерва игра и за да прекине црна низа долга 24 години

05 јули 2026 - 16:37

Бразил вечерва од 22 часот ќе го игра осминафиналниот натпревар на Светското првенство против Норвешка, избраниците на Карло Анчелоти можеби важат за фаворити, но Норвежаните се сериозна селекција и можат да изненадат секого.

Освен тоа на Бразилците не им оди во прилог и една негативна традиција. Имено, последната европска репрезентација која Бразил ја победил во нокаут-фаза на Светско првенство е Германија во 2002 година, во финалето во Токио.

Од тогаш, „кариоките“ редовно испаѓаат од европски селекции на завршните турнири. Во 2006 година Франција ги победи со 1-0 во четвртфиналето, четири години подоцна во Јужна Африка, Холандија беше подобра со 2-1, а потоа следеше и историскиот пораз од Германија во Бело Хоризонте, кога домаќинот беше декласиран со 7-1 во полуфиналето.

Во Русија, Бразил загуби од Белгија со 2-1 во четвртфиналето, додека во Катар беше елиминиран од Хрватска по изведување пенали, исто така во четвртфиналето.