Марковски и Србљак победници во двојки на турнирот во Скопје!

04 јули 2026 - 20:43

Македонските тенисери Обрад Марковски и Горазд Србљак се освојувачи на титулата во конкуренција на двојки на годинашното издание на Македонија Опен, откако во финалето беа подобри од бугарскиот пар Никола Керемедчиев и Давид Симеонов со 2-0 во сетови (7-5, 6-4).

До трофејот македонската комбинација стигна по 79 минути игра, во меч во кој клучните моменти дојдоа во завршниците на двата сета. Во првиот сет, Марковски и Србљак први направија брејк и поведоа со 4-3, но ривалите веднаш возвратија. Сепак, во клучниот 11. гем повторно го одзедоа сервисот и го затворија сетот со 7-5.

Во вториот сет, одлучувачки беше брејкот за 4-3, по што со уште еден брејк во финишот го потврдија триумфот и го добија сетот со 6-4, за конечна победа и освојување на титулата.

Претходно денеска, Марковски и Србљак во полуфиналето без поголеми проблеми ги елиминираа Николас Бруна и Франциско Томас Гешвинд со 2-0 во сетови.

Финалето во сингл конкуренција е закажано за утре од 11:30 часот, а за титулата ќе се борат македонскиот тенисер Калин Ивановски и Украинецот Владислав Орлов.