Ќе се одржи нова панел дискусија - „Ракометот спорт број 1?“

02 февруари 2026 - 12:17

Во организација на „Само ракомет“, а под генерално покровителство на Ракометната федерација на Македонија, во хотелот „Дабл Три“ во Скопје ќе се одржи втора панел дискусија насловена како „Ракометот спорт број 1?“, на неа ќе земат учество повеќе ракометни работници.

Настанот ќе се одржи на 23 февруари со почеток од 8:30 часот, а ќе биде поделен во три сесии.

Првиот панел е насловен како „Влијанието на медиумите и социјалните мрежи“, на него ќе учествуваат ракометарот Милан Лазаревски, новинарот Зоран Мишевски, тренерот Горан Кузмановски и психологот д-р Емилија Бошковска.

Вториот панел е „Развој и промоција на Ракометот и врската со училишниот спорт, или каде почнува создавањето на играч“, на него ќе дискутираат: Координаторот на машките селекции Филип Миркуловски, генералниот секретар на РФМ, Влатко Тасевски, Горан Ѓоргоновски од школата „Ракомет за секое дете“, како и Елена Мицковска од Федерацијата на училишниот спорт.

Последната панел дискусија е „Стратешки цели и насоки за развој на ракометот“, а на неа збор ќе имаат: спортскиот директор на Вардар, Владо Недановски, Кирил Пецаков од ГРК Охрид, Славе Николов како претставник на здружението на судии и претседателот на РФМ, Александар Стефанов.

Модератор на дискусијата ќе биде спортскиот новинар Перо Момировски.