Македонија по рововска битка дури во финишот ги скрши „фудбалерите“ од Ирска (ФОТО)

Тоа беше рововска битка што траеше повеќе од два часа, во која дури во финишот го скршивме отпорот на борбениот домаќин. Клучна беше серијата 15-3 во втората половина од последната четвртина, со која дојдовме дури и до двоцифрена предност, која дефинитивно не ја дава вистинска слика на односот на теренот. Ирците почнаа одлично, доминираа во поголем дел од првото полувреме во кое имаа дури и водство со плус 11 (31-20). Но, жолто-црвените одлично го затворија вториот период и со серија 15-2 дури заминаа со водство на одмор (42-40).

Продолжението донесе релативно изедначена игра со промени во водството, се до моментот кога на семафорот беше 71-71. Следуваа низа грешки на домашниот тим, кои нашиот далеку поискусен состав жестокот ги казни и дојде до посакуваната победа. Андреј Јакимовски со 26 поени повторно беше лидер на македонската чета, а веднаш зад него беше Џејков Вајли со 20 поени и девет скока.

Македонија сега е лидер на табелата заедно со Луксембург – двете селекции имаат скор 2-0, додека Ирска и Азербејџан имаат учинок 0-2. Следните предизвици ни се на крајот од февруари и на почетокот од март кога прво ќе ги пречекаме луксембуршките кошаркари, а потоа ќе им гостуваме на Азербејџанците. Сигурен пласман во втоата претквалификациска фаза сигурно ќе обезбеди само првиот во групата.