Вардар и Струга ја продолжуваат борбата за есенската „титула“

Двете екипи денеска играат на домашен терен со тоа што „црвено-црните“ имаат далеку полесна задача. На Градски (13 часот) доаѓа грогираниот Шкупи во мечот кој некогаш беше дерби на македонскиот фудбал и директно одлучуваше за трофеите.

Сега е тоа дуел на првата и последната екипа на табелата, Вардар кој е единствен без пораз сезонава и во моментов во серија од пет победи и Шкупи кој освои само еден бод и загуби 13 од досегашните 14 натпревари. На три кола пред крајот на есенската полусезона, Вардар има голема шанса годината да ја заврши на челната позиција.

Вториот денешен меч, прв на програмата бидејќи почнува во 12:30, би требало да е нешто поинтересен бидејќи се среќаваат Струга и Башкими. Стружани заостануваат еден бод зад Вардар и се со голема предност во однос на денешниот ривал, но два од трите „кикса“ во досегашниот дел од сезоната доживеаја на домашен терен каде загубија од Брера и ремизираа со Шкендија. Башкими е во нешто полоша форма, во последните четири кола оствари само еден триумф и денеска ќе се обиде со евентуално изненадување да избега од опасната зона.