Меси се израдува на трофеј со Интер, но џабе сѐ ако не ја добие – последната битка (ВИДЕО)

30 ноември 2025 - 08:55

Екипата на Интер Мајами стигна до големото финале на МЛС, освојувајќи го трофејот во Источната конференција со ноќешната убедлива победа над Њујорк Сити (5-1).

Тимот на Дејвид Бекам уште еднаш ја потврди одличната форма и без поголеми проблеми го обезбеди првиот од двата чекори до шампионската титула. Интер уште од самиот старт го наметна ритамот. Тедео Аљенде го отвори резултатот во 14. минута, а само девет минути подоцна, по асистенција на Жорди Алба, повторно Аљенде ја затресе мрежата за убедливи 2-0. Њујорк накратко се врати во игра преку голот на Џастин Хак во 37. минута, но тоа беше и единствениот момент кога гостите се доближија до резултатска неизвесност.

Во продолжението, сцената целосно ѝ припадна на екипата од Мајами. Лионел Меси во 67. минута мајсторски го пронајде Матео Силвети за 3-1, а финишот донесе уште две реализации со кои Интер ја зацврсти доминацијата и го подигна пехарот за најдобар тим на Истокот.

Составот од Флорида во големото финале ќе се соочи со шампионот од Западната конференција – Ванкувер Вајткепс. Канадскиот тим, предводен од ветеранот Томас Милер, во своето конференциско финале славеше против Сан Диего (3-1).

ФОТО: EPA PHOTO