Фламенго е нов првак на Јужна Америка, Бразилците конечно ја достигнаа Аргентина (ВИДЕО)

30 ноември 2025 - 08:34

Фламенго дојде до нова јужноамериканска круна, победувајќи го Палмеирас (1-0) во синоќешното финале на Копа Либертадорес одиграно во Лима (Перу).

Иако дуелот помеѓу двата бразилски гиганти не понуди привлечен фудбал, натпреварот донесе жестока тактичка битка и уште поголемо подгревање на ривалството меѓу Рио де Жанеиро и Сао Паоло. Клучниот момент падна веднаш по паузата: по изведен корнер од Де Араскаета, Данило се издигна највисоко и со прецизен удар со глава го совлада голманот на Палмеирас, поставувајќи го единствениот гол на натпреварот. Иако зелено-белите се обидоа да притиснат и создадоа неколку опасни акции, не успеаја да го променат резултатот.

Триумфот значи четврта титула во Копа Либертадорес за Фламенго и историско израмнување меѓу бразилските и аргентинските клубови — и двете земји сега имаат по 25 континентални трофеи. Дополнително, Бразилците имаат повеќе пласмани во финалињата - вкупно 45 во однос на 38 на Аргентина.

Со оваа победа, Фламенго обезбеди настап на претстојниот Интерконтинентален куп, а клубот веќе има гарантирано место и на Светското клупско првенство во 2029 година.

ФОТО: EPA PHOTO