„Старецот“ Пешиќ го навлече гневот на Гробари – брутално го потцени Обрадовиќ!

Според него, заминувањето на трофејниот стратег е големо изненадување, особено поради целосната поддршка што ја имал во клубот и меѓу навивачите. Пешиќ посочи дека атмосферата во тимот била стабилна и дека суперлативите со кои бил „бомбардиран“ Обрадовиќ во јавноста делумно создавале нереална слика.

„Имаше огромна поддршка - од клубот и од навивачите. Затоа и е изненадување. Но, јавноста направи од Жељка многу повеќе отколку што тој реално е. Тој е голем тренер, со огромно искуство и знаење, но околу него се создаде наратив кој никој не може самиот да го носи“, истакна Пешиќ, нагласувајќи дека таквиот притисок влијае и на резултатите и на односите во тимот.

Во продолжение, тој објасни дека модерната кошарка носи нови предизвици – менување на приоритетите кај играчите, намалување на моќта на тренерот и потреба од поделена одговорност.

„Обрадовиќ презеде премногу на себе. Тоа никогаш не е добро. Одговорноста мора да се дели со играчите – за тренинзите, однесувањето, хемијата во тимот. Кога тренерот сè држи сам, доаѓа момент кога играчите велат: ‘Ти си најголемиот, ти решавај’. Тоа е погрешно“, додаде Пешиќ.

Состанокот меѓу Управниот одбор на Партизан и Обрадовиќ, на кој требаше да се разгледа можноста за негово останување по поднесената оставка, беше прво одложен. Подоцна, клубот се огласи со официјално соопштение во кое потврди дека соработката со трофејниот тренер е завршена.

ФОТО: EPA PHOTO