Лампард гази во Чемпионшип - плус 10 пред второпласираниот и 50 постигнати гола

Најдобар доказ е тековната сезона на Ковентри, тим што го презеде во тежок период, а кој моментално го држи на првото место на табелата со 43 бода од 18 кола, со импресивен сооднос од 13 победи и само еден пораз. Поважно е што Ковентри постигна 50 гола и прими само 18, што е убедливо најдобрата гол-разлика во лигата. За споредба, вториот најефикасен тим во оваа конкуренција е седмопласираниот Хал кој досега постигна 30 гола. Разликата пред второпласираниот Мидлброу е десет бода, а 12 од третопласираниот Милвол.

Тимот на Лампард не само што собра бодови против послаби тимови, туку серијата клучни натпревари покажаа колку е тактички стабилен и офанзивно конкретен. Во првиот месец го демолира КПР со 7-1, го доби Дерби, а единствениот пораз го доживеа од Рексам со 2-3.

Формата во последните пет кола (исто толку победи) дополнително го потврдува континуитетот кој му беше голем проблем на Лампард во Премиер лигата. Ковентри не покажува проблеми што би укажувале на пад, а сега, влегувајќи во декемврискиот ритам, изгледа зрел како тим подготвен да се врати во елитата.

Ако продолжи со ова темпо, Лампард би можел да добие уште една шанса да се докаже во Премиер лигата, но овојпат со тим што го изгради самиот и каде што нема да има почетен притисок. Ковентри, по години осцилации, конечно би можел да стане стабилен, модерен клуб подготвен за највисоко ниво. Лампард очигледно ја наоѓа својата најдобра верзија во Чемпионшип, а оваа сезона изгледа подобро од кога било.