Скопје домаќин на спектакуларен олстар-меч – сите ракометни легенди на едно место!

03 октомври 2025 - 12:03

На крајот од месецов, спортскиот центар „Јане Сандански“ ќе биде домаќин на ревијалниот спектакл „Легендите на сцена“ (29 октомври), организиран во чест на 20-годишнината од постоењето на „Спортско радио 90,3 ФМ“.

Настанот ќе ги собере на едно место најголемите имиња на македонскиот ракомет од последните децении. Се очекува на терен да се појават легенди како Кирил Лазаров, Борко Ристовски, Стојанче Стоилов, Филип Миркуловски, Пепи Манасков, Наумче Мојсоски, Ванчо Димовски, Гоце Георгиевски и многу други поранешни репрезентативци.

Покрај домашните ѕвезди, во Скопје ќе пристигнат и интернационални легенди кои оставија силен белег во европскиот и светскиот ракомет: Меѓу нив се Арпад Штербик, Жоан Кањелас, Иван Чупиќ, Тимур Дибиров, Домагој Дувњак, Ивано Балиќ, Лука Циндриќ, Ренато Вугринец, Игор Карачиќ и други звучни имиња.

Ревијалниот дуел ќе биде предводен од искусни селектори и судии, меѓу кои Лино Червар, Веселин Вујовиќ, Звонко Шундовски, Ристо Магдинчев и судиските двојки Маријан и Драган Начевски, како и Ѓорѓи Начевски и Славе Николов.