Несреќа во Белград: Пијан возач се забил во автомобилот на кошаркар на Црвена Звезда!

Српскиот репрезентативец и кошаркар на Црвена звезда, Дејан Давидовац, вчера доживеа сообраќајна несреќа откако во неговиот автомобил удрил 52-годишен возач под дејство на алкохол.

Тој, за среќа, минал без повреди, полицијата веднаш интервенирала, а возачот е уапсен и задржан 48 часа, по што ќе биде изведен пред обвинителство. Црвено-белите информираа дека нивниот кошаркар бил жртва во инцидентот, но дека нема никакви последици по неговото здравје.

„Нашиот Дејан Давидовац имаше сообраќаен удеc кој не го предизвика. Тој е целосно здрав, денеска тренираше и беше на заедничкиот ручек со тимот,“ соопшти клубот.

Со реакција се јави и Кошаркарската федерација на Србија, која потврди дека репрезентативецот е добар и без повреди.