Миовски веќе потпиша за Ренџерс, Елмас утре ќе „парафира“ за Наполи!

29 август 2025 - 21:51

Македонските репрезентативци успешно го финишираа летниот трансфер-прозорец, откако веќе е официјално дека Бојан Миовски и Елиф Елмас ќе ја сменат клупската средина - напаѓачот потпиша четиригодишен договор со Глазгов Ренџерс, додека офанзивниот играч за врска се враќа во Наполи.

Миовски денеска успешно ги заврши лекарските прегледи, а официјалната промоција е закажана за сабота. Ренџерс на шпанската Џирона ќе ѝ исплати 2,6 милиони фунти, сума што со бонуси може да достигне до 4,2 милиони евра. Македонскиот напаѓач остави силен впечаток во дресот на Абердин, постигнувајќи 44 погодоци на 98 натпревари во последните две сезони.

Елмас, пак, по една и пол година повторно ќе заигра за Наполи. Италијанскиот шампион договори едногодишна позајмица вредна два милиони евра, со можност следното лето да го откупи договорот од Лајпциг за дополнителни 17 милиони. Утре се очекуваат медицинските прегледи и потписот на договорот. Македонскиот репрезентативец претходно настапуваше на 189 средби за Наполи, каде што забележа 19 гола и 11 асистенции, пред да биде продаден во Лајпциг за 24 милиони евра.