Данска е нов светски јуниорски првак, но Фарски Острови испишаа историја

29 јуни 2025 - 21:46

Младите ракометари на Фарски Острови се запишаа во историјата на спортот во своајта земја откако на Светското првенство за играчи до 21 година ја победи Шведска со 27-26 во мечот за третото место и го освоија првиот медал за својата држава.

Ова е круна на развојот на младинскиот ракомет на Фарски Острови чија селекција до 21 година на претходниот Мундијал пред две години стигна до четвртфиналето каде загуби од Србија, а на крајот го освои седмото место со биланс од шест победи и само два пораза. Сличен ефект имаа и на годинашниот шампионат на кој повторно остварија шест победи и два пораза, но имаа и едно реми, само што тоа сега им донесе медал.

Светската титула во оваа конкуренција ја освои Данска која во финалето ја совлада Португалија со 29-26. За Данска тоа е четврти трофеј во историјата, прв по пауза од 20 години и сега е на само еден пехар од рекордерот СССР.

И македонската јуниорска репрезентација настапи на овој шампионат и го освои 25. место.