МЗТ со камата му се одмазди на ТФТ за потврда на првото место пред плејофот (ФОТО)

15 март 2025 - 20:04

Кошаркарите на МЗТ Скопје дефинитивно плејофот ќе го почнат од првата стартна позиција, откако со вечерашната победа на домашен терен против ТФТ (74-68) на две кола пред крајот на регуларниот дел го осигураа лидерското место на табелата.

„Металците“ воедно му се реваншираа за поразот во првиот дел од првенството (70-75) и го испратија во неизвесна битка за втората позиција заедно со Работнички, Куманово, Пелистер и Кожув. Аеродромци клучната предност ја обезбедија во финишот од првата и стартот на втората четвртина, кога со серија 16-3 дојдоа до предност со 14 поени (28-14), која умешно ја задржаа до самиот крај. Двата тима шутираа лошо, домаќинот едвај стигна до 40-отстотна прецизност, додека гостинот застана на 37-отсто, а клучно за триумфот на сино-белите беше огромната доминација во играта под кошеви, каде што имаа дури 17 скокови повеќе (50-33).

Дион Едвин беше најзаслужен за триумфот на составот од Аеродром со 23 поени и 12 скока од кои пет во напад, додека двоцифрен поентерски ефект имаа уште и Војдан Стојановски со 12 поени и Андреј Маслинко со 11 поени и девет скока. Георги Зафиров со 20 поени беше најпрецизен кај популарната Тафта.

МЗТ сега има скор 15-5, додека ТФТ „падна“ на 13-7. Седум порази имаат уште и Работнички и Куманово, но со меч помалку и тоа утрешниот меѓусебен дуел. Кожув има скор 12-8, а осум порази има и Пелистер, но со натпревар помалку, вечерашниот на гости кај Чаир 2030.