Барса во лоша серија во каква не била шест децении

22 декември 2024 - 11:12

Сезоната која ја почна фантастично и во која се чинеше дека ќе се прошета до шампионската титула во Ла Лига, одеднаш се претвори во кошмар за Барселона.

Во првите 12 кола, тимот оствари 11 победи, вклучувајќи го оној триумф од 4-0 против Реал на „Бернабе“, а оттогаш, на седум меча, освои вкупно пет бода. Проблематични излегоа натпреварите на домашен терен бидејќи пред своите навивачи, Барса загуби од Лас Палмас, Леганес и синоќа од Атлетико Мадрид.

Три порази по ред на домашен терен Барселона немала од 1965 година или безмалку шест децении. Тогаш загубила од Валенсија, Атлетико и Сарагоса и никогаш подоцна не претрпела три порази дома.

Интересно е тоа што Барселона оваа сезона е најдобар тим на гостински терен каде освои 23 бода со седум победи и два нерешени резултати. Пред своите навивачи, пак, нема победа од 3 ноември, а следниот меч на Монжуик го игра на 26 јануари.