Алкалоид лесно и против Куманово

01 ноември 2024 - 19:50

Ракометарите на Алкалоид во првиот натпревар од 10. коло во Суперлигата запишаа уште една убедлива победа против тимот на Куманово славејќи на домашен терен со 40-25.

Од самиот почеток домаќинот го наметна своето темпо на игра и предноста многу брзо растеше со што стануваше јасно дека гостите нема да имаат никакви шанси за некакво изненадување.

Во завршницата од првото полувреме Алкалоид за првпат стигна и до двоцифрена предност од десет голови разлика (18-8). На паузата избраниците на Кире Лазаров веќе имаа и водство од 23-11.

Ништо не се промени ниту во второто полувреме и Алкалоид продолжи да ја одржува предноста за на крајот да слави и со 15 голови разлика. Најефикасен на натпреварот беше Петковски со девет постигнати гола, Оливеира додаде осум, а исто толку за Куманово постигна Симовски.

По десет одиграни натпревари Алкалоид е единствениот тим во македонското првенство со максимален учинок.