Кејн нема да биде стартер против Грција, Англија ќе има нов капитен

10 октомври 2024 - 09:49

Најдобриот стрелец во историјата на англиската репрезентација Хари Кејн нема да биде дел од стартната постава на вечерашниот натпревар против Грција, во Лигата на нации затоа што уште не е заздравен по повредата што ја доживеа во дресот на Баерн.

Селекторот Ли Карсли порача дека не сака да ризикува со неговото здравје и можно е вечерва воопшто да не го користи, но во исто време изрази надеж дека Кејн ќе биде подобар до недела кога Англија ѝ гостува на Финска. Поради отсуството на Кејн, Карсли мораше да назначи нов капитен за вечерашниот меч, а таа чест ја доби фудбалерот на Манчестер Сити, Џон Стоунс.

„Ова е остварување на мојот детски сон. Му благодарам на Ли, останав без зборови кога ми соопшти дека ќе бидам капитен“, рече Стоунс.

Денешниот дуел меѓу Англија и Грција е директна пресметка за првото место во групата 2 од Лигата Б бидејќи по првите две кола двете селекции имаат по шест бода.