Македонија и бегството од европското дно ќе го почне без Димитријевиќ во тимот!?

Патот кон површината нема да биде лесен, без разлика што противниците се речиси залутани во овој спорт, а последните информации велат дека тој ќе биде уште потежок поради речиси сигурното отсуство на најдобриот (на хартија) наш кошаркар – Ненад Димитријевиќ. Тој веќе еден месец не настапува за рускиот тим Зенит и тоа поради скршеница на прстот на левата нога. Последните информации велат дека веќе почнал со индивидуални тренинзи, но засега не е познато кога би се вратил на паркетот. Знаејќи дека во минатото повеќе наоѓал изговори да не игра за Македонија отколку што го носел жолто-црвениот дрес, за очекување е овој пат да ја искористи повредата за да се заблагодари за евентуалната покана за настап во најниското по ранг натпреварување во репрезентативниот баскет.

Македонија е во единствената од трите групи со четири селекции, меѓу кои уште е и Луксембург. Средбите од оваа претквалификациска фаза освен месецов ќе се играат и во февруари и јуни/јули следната година. Победниците од секоја група, заедно со најдобриот состав меѓу второпласираните ќе обезбедат пласман во вториот круг од претквалификациите за собирот по дури четири години.