Ди-Џеј „отсвири“ маестрално: Кошаркарите им се реваншираа на Бугарите (ФОТО)

25 јуни 2026 - 20:19

Македонската кошаркарска репрезентација оствари победа над Бугарија (91-87) во вечерашниот пријателскиот натпревар одигран во салата „Лазар Лечиќ“ во Скопје, со што се реваншираа за поразот во првиот контролен дуел одигран минатата недела во Самоков.

Избраниците на селекторот Жозеп Мариа Берокал одиграа далеку подобро, а одлично деби имаше и нашето ново американско засилување, Ди-Џеј Стјуарт Џуниор. Двете селекции одиграа прилично тврд и неизвесен меч. На паузата резултатот гласеше 45-43, а потоа ривалот ја доби третата четвртина, но Македонија заигра подобро во последните десет минути. На шеесетина секунди до крајот, нашите кошаркари имаа +4 (83-79), а на крајот триумфираа со конечен резултат 91-87.

Најдобри поединци кај Македонија беа Стјуарт Џуниор со 26 поени и Стојан Ѓуроски со 15 поени, додека двоцифрен ефект имаше и Виктор Ефремовски со 12 поени. Лоша вест од овој пријателски меч е повредата на Марин Петков уште во првото полувреме, кога само што влезе во игра лошо згазна на ногата на еден од противниците и го свитка скочниот зглоб. Тој потоа беше третиран од лекарскиот тим и воопшто не влезе до крајот на средбата.

Ова беа подготвителни натпревари за јулскиот циклус од првата претквалификациска фаза за ЕП 2029, во која жолто-црвените прво ќе ја пречекаат Ирска (2 јули), а три дена подоцна ќе му гостуваат на Луксембург.