МЗТ прво ќе чека помош од Хелиос, па ако ја добие ќе мора да победи во Тиват!

Аеродромци важат за фаворит против ривалот кој сè уште нема победа во оваа фаза, но клучен за амбициите на нашиот тим ќе биде и исходот од паралелниот дуел во Домжале. Таму, тимот на Хелиос ќе се соочи со Цедевита Јуниор, во меч во кој на МЗТ Скопје неопходна ќе му биде победа на домаќинот за да остане во трката за второто место на табелата, кое води во Топ-8.

Натпреварот во Домжале започнува во 18 часот, додека мечот на МЗТ Скопје против Теодо е закажан за 20 часот, што значи дека македонскиот претставник ќе ја знае својата судбина уште пред да излезе на терен во Тиват. Домжале веќе го обезбеди пласманот во следната фаза со максимални четири победи, но мора да биде внимателен бидејќи Цедевита Јуниор теоретски може да го претекне ако слави со повеќе од осум поени разлика.

Во досегашниот дел од сезоната, МЗТ Скопје оствари една победа, токму против Теодо во првото коло, со убедливи 68-50. Тој триумф ги зголеми очекувањата дека македонскиот шампион ќе се бори за највисоките позиции, но следуваа три тесни порази, поради кои сега зависи од резултатите на другите тимови.