МЗТ, Пелистер и Работнички добија сериозни противници во АБА2-лигата!

15 јули 2024 - 13:07

Македонските претставници во АБА2-лигата денеска ги дознаа имињата на ривалите во првата фаза по групи од новата сезона, во која ќе се игра на драстично променет начин од било која досегашна сезона.

МЗТ Скопје единствен од нашите клубови ждрепката ја дочека од првиот барабан, но и покрај тоа доби незгодна група во која ќе има силна конкуренција во Хелиос, кој е поранешен член на јадранската елита и во незгодната Цедевита јуниор, додека улогата на аутсајдер ќе ја има црногорскиот тим Теодо од Тиват. Уште потешка група доби и Работнички, кој мораше да плати 25.000 евра за да добие специјална покана за АБА2 каде што ќе игра против фаворизираните Војводина и Сутјеска, како и со поранешниот европски шампион, Босна Сараево.

Кошаркарите на Пелистер за ривали ќе ги имаат Подгорица и Широки како подобро рангирани пред ждрепката, како и српскиот тим Вршац, кој е еден од добитниците на вајлд-картите.  Следната сезона ќе нема „балони“, натпреварите се играат дома и на гости, а екипите се поделени во четири групи. По првата фаза, по две екипи од секоја група се пласираат во Топ осум-фазата, каде што се формираат две нови групи со по четири тима, од кои најдобрите две состави ќе се пласираат во полуфиналето, кое се игра до две победи, исто како и големото финале кое ќе го даде новиот патник во АБА.

Новата сезона ќе почне на 24 септември.

РАСПОРЕД НА ГРУПИТЕ ВО АБА2

ГРУПА А: МЗТ СКОПЈЕ, Хелиос, Цедевита јуниор, Теодо Тиват.

ГРУПА Б: Војводина, Сутјеска, РАБОТНИЧКИ, Босна.

ГРУПА Ц: Подгорица, Широки, ПЕЛИСТЕР, Вршац.

ГРУПА Д: Златибор, Борац БЛ, Шибенка, Илирија.