„Страшниот“ Шарлот броеше до 150, ѕвезда на Бостон удри по судиите (ВИДЕО)

11 јануари 2026 - 08:38

Кошаркарите на Шарлот Хорнетс беа на чекор до рекордот на сезоната во НБА, откако како гости убедливо ја совладаа Јута Џез со 150-95, постигнувајќи само два поени помалку од најдобриот поентерски учинок сезонава, кој го држи Чикаго Булс.

„Стршените“ до триумфот дојдоа со одлична тимска игра и рамномерна распределба на поените, при што дури девет кошаркари имаа двоцифрен учинок. Најефикасен беше Тре Ман, кој како резерва уфрли 20 поени за само 12 минути. Брендон Милер додаде 18, а ЛаМело Бол 17 поени. Кај Јута се истакна Брајс Сенсабо со 26 поени. Рекордот на сезоната и натаму им припаѓа на Чикаго, кој непосредно пред Божиќ ја победи Атланта Хокс со 152-150.

Бостон Селтик, пак, загуби на домашен терен од Сан Антонио Спарс (95-100), по што ѕвездата на „келтите“, Џејлен Браун, јавно го критикуваше судењето.

„Преку глава ми е од нивната непостојаност. Подготвен сум да ја платам казната зашто го кажувам ова“, изјави Браун, кој мечот го заврши со 27 поени, исто колку и Дерик Вајт.

Кај „мамузите“, Виктор Вембањама и Ди’Арон Фокс постигнаа по 21 поен, за 27. победа на тимот во 38 одиграни натпревари.

РЕЗУЛТАТИ: Кливленд – Минесота 146-134, Шарлот – Јута 150-95, Бостон – С. Антонио 95-100, Индијана – Мајами 123-99, Детроит – ЛА Клиперс 92-98, Чикаго– Далас 125-107.