Јокиќ полека, но сигурно ја губи битката за третиот МВП трофеј по ред (ФОТО)

18 март 2023 - 09:38

Центарот на Денвер нагетс, Никола Јокиќ, во најголемиот дел од сезоната беше убедливо најголемиот фаворит за МВП-трофејот во НБА, кој би му бил трет по ред, но во моментов полека, но сигурно ја губи оваа битка во однос на Џоел Ембид од Филаделфија севентисиксерс.

Србинот првпат по (по)долго време не е на врвот на листата фаворити за освојување на ова признание, каде што се искачи Французинот со камерунско потекло, Џоел Ембид. Тој во моментов е најдобар стрелец во лигата со 33,5 поени со 10,2 скока и 4,1 асистенции додека „сиксерси“ се трети на Истокот. Јокиќ, пак, во моментов просечно реализира по 24,8 поени, 11,9 скока и 9,9 асистенции додека неговиот тим е убедливо најдобар во Западната конференција.

Трет во оваа трка е Јанис Адетокумпо со просек од 31,4 поени, 11,9 скокови и 5,5 асистенции во ситуација кога неговиот Милвоки бакс е лидер на источниот дел од НБА. Регуларниот дел од лигата трае уште три недели.