Олимпија Милано му ја продолжи агонијата на Партизан

15 ноември 2024 - 22:39

Екипата на Партизан го доживеа шестиот пораз по ред во Евролигата, четврти на домашен терен откако вечерва загуби од Олимпија Милано со 81-88.

„Црно-белите“ повторно потфрлија и покажаа дека се далеку од воигран колектив и по десет одиграни кола имаат биланс 2/8. Денеска не успеаја да триумфираат и покрај тоа што во втората четвртина имаа предност од 12 поени разлика (38-26).

Клучна беше серијата од 7-0 на Олимпија Милано кон средината на последната четвртина по која италијанскиот шампион поведе со 82-76. Партизан имаше шанса во финишот, се доближи на еден посед (79-82), но не го искористи најважниот напад и се отиде во неврат.

Македонскиот репрезентативец Ненад Димитријевиќ не се прослави на денешниот натпревар. На теренот помина само девет минути, цело второ полувреме го преседе на клупа, а постигна три поени и тоа првите на натпреварот за 3-0 за Олимпија Милано.