„Црно-бела“ рапсодија: Партизан го растури Макаби пред серијата гостувања

Пред околу 20 илјади гледачи во белградска Арена, „црно-белите“ славеа со 98-75 и на најдобар можен начин се загреаја за серијата дуели на гостински терен. На Партизан му претстојат три меча по ред надвор од Белград и пет во следните седум меча што ќе биде вистински тест за него дали може да се надева на пласман во разигрувањето за титулата.

Многу работи на денешниот меч беа решени уште во првата четвртина која Партизан ја доби со 27-12. Во вториот период Макаби се доближи на осум поени негатива, но домаќините не дозволија драма и брзо го откажаа противникот од сите намери евентуално да направи пресврт.

Сепак, овој триумф не донесе напредок за Партизан на табелата бидејќи тимот и натаму се наоѓа на 13. позиција на табелата со биланс 9/10. Макаби е уште полош, има само пет победи и е на претпоследното место.

РЕЗУЛТАТИ
Фенербахче - Анадолу Ефес 84-76
Панатинаикос - Виртус 111-90
Париз - Барселона 79-90
Партизан - Макаби 98-75
Реал - Баерн 88-76