Барселона верна на Евролига – останува уште една деценија

23 јануари 2026 - 09:51

Кошаркарскиот клуб Барселона потврди дека ќе ја обнови својата десетгодишна лиценца со Евролигата, со што ги отстрани дилемите за сите оние кои мислеа дека најавите за ова сценарио нема да се остварат.

Она што беше објавено минатата недела, синоќа беше потврдено од страна на одборот на каталонскиот клуб, па Евролигата не мора да се грижи за еден од своите главни акционери. Оваа одлука доаѓа само три дена откако во Лондон се одржа состанокот на НБА Европа, на кој присуствуваа претставници на многу клубови од Евролигата.

Останува можноста Барселона да се предомисли и да го промени својот став во секое време, но за одлуката да се приклучи на НБА Европа во блиска иднина ќе мора да плати дури 10 милиони евра. Како што е наведено на порталот „Мундо Депортиво“, менаџментот на Барселона не сакаше да ризикува ништо, бидејќи проектот НБА Европа е планиран за есента 2027 година, а договорот со Евролига истекува на крајот од оваа сезона.

Каталонскиот клуб не сакаше да игра во Лигата на шампионите на ФИБА следната година, особено затоа што НБА Европа е проследена со многу недоследности. Како што стојат работите, Реал Мадрид и покрај противењето на навивачите, е единствениот што е заинтересиран да се сврти кон НБА.