ТФТ имаше плус 20, падна во бездна, па чудесно дојде до четврти меч со МЗТ (ФОТО)

Тоа беше неквалитетен меч со неверојатно драматична разврска, вистински ролеркостер на емоции во двата табори, а клучна на крајот се покажа серијата 10-0 на домаќинот во вториот дел од последната четвртина со која негативата од четири поени (52-56) беше претворена во позитива вредна историска финална победа. Мечот беше чуден со две дијаметрално различни полувремиња.

Првото мина во стравична доминација на домашниот тим, кој почна со серија 14-1 и до крајот на вториот период ја контролираше играта и резултатот. Популарната Тафта во еден момент имаше и предност со 20 поени (39-19), а на одмор заминаа со позитива изразена со еден поен помалку (42-23). МЗТ шутираше очајно и имаше 11 промашени тројки во овој дел од играта и мизерни 22-отсто шут од поле.

Но, во третиот период на теренот како да истрчаа други момци во сино-бели дресови, кои за само осум минути ја анулираа огромната негатива на противникот носени со стартната серија 15-2. На крајот од овој дел од играта беше 52-52, а последните десет минути беа навистина тешки за гледање – вистински очобол. ТФТ првите пет минути немаше дадено ниту еден поен, а гостите постигнаа само четири „гола“. Тогаш следеше клучната серија 10-0 на составот од скопско Тафталиџе со што го решија натпреварот, но и во тој период останаа без најдобриот Закари Браун, кој потешко се повреди при еден доскок.

Браун со 20 поени, осум скока и пет асистенции беше лидер во херојскиот триумф на ТФТ, додека Ташовски постигна 17, а Говенс 15 поени. Дион Едвин со 19 и Андреј Маслинко со 12 поени и со по девет скока беа најдобри кај МЗТ.

Четвртиот дуел од серијата се игра в понеделник (2 јуни) повторно во СРЦ „Кале“.