Ништо ново во макбаскетот: МЗТ со лесен трискок против Маџари дојде до 13. титула (ФОТО)

24 мај 2026 - 20:56

Кошаркарите на МЗТ Скопје остануваат неприкосновен владетел во македонската кошарка, откако со вечерашната трета победа по ред во финалната плејоф-серијата против Маџари (80-74) дојдоа до 13. титула.

Неизвесноста траеше само во првата четвртина, во која дебитантот во елитата во првиот домашен финален меч во кусата клупска историја го наметна својот ритам и на момент поведе и со седум поени разлика (26-19). Тоа како да ги налути „металците“, кои прво со девет поени во низа прават резултатски пресврт (28-26), за нешто подоцна во првиот период со серија 11-2 да дојдат до веќе големи плус осум (46-38) како најава за крајниот епилог.

Домаќинот не се предаваше без разлика на водството на противникот, па во последниот дел од мечот во два наврати дури и го изедначи резултатот (66-66), но искуството на првакот повторно дојде до израз. Растрчаните аеродромци со 10-3 повторно дојдоа до опиплива позитива (76-69), која умешно ја задржаа до самиот крај.

Војдан Стојановски со 17 поени беше убедливо најдобар кај МЗТ Скопје, каде што се истакнаа уште и Душан Танасковиќ со 16 поени и седум скока и Мек Смит со 13 поени, шест скока и осум асистенции. Амар Хот со 20 поени и 18 скока беше убедливо најдобар кај Маџари.

Составот од Аеродром со овој триумф продолжи да му се приближува на Работнички на вечната листа, на која разликата сега е само два пехари (13-15).