МЗТ со уште една моќна победа над Гостивар дојде до мал чекор од полуфиналето!

13 април 2024 - 19:54

Кошаркарите на МЗТ Скопје дојдоа до мал чекор до пласман меѓу четирите најдобри во плејофот од македонското првенство, откако вечерва вторпат по ред убедливо го совладаа Гостивар (89-67) и поведоа со 2-0 во четврт-финалната серија што се игра до три победи.

Неизвесно беше само во првата четвртина, во која гостите имаа и водство со 17-12, а во првите неколку минути од вториот период се играше кош за кош со неколку промени во водството и изедначени ситуации на семафорот. Веќе пред крајот на полувремето „металците“ дојдоа до првата поопиплива разлика (37-29) како најава на крајниот епилог. Второто полувреме беше максимално еднострано, што најдобро се гледа од огромните плус 34 (81-47) во последниот период. Потоа дојде до опуштање кај домашните и намалување на крајната негатива од страна на гостите.

Харис Делалиќ со 14 поени и шест скока, Дамјан Робев со 13 поени и Андреј Андоновски со 12 поени беа најпрецизни кај тимот од Аеродром, додека Тома Стојаноски со 20 поени беше најефикасен кај Гостивар.

Третиот меч од серијата, кој воедно е прва „меч-топка“ за МЗТ Скопје, ќе се одигра следниот викенд поради настапот на сино-белите во доигрувањето од АБА2-лигата.