МЗТ се засили со уште еден повратник – репрезентативец на Македонија!

10 септември 2024 - 12:51

Македонскиот шампион, екипата на МЗТ Скопје, продолжува да го комплетира ростерот за новата сезона, откако денеска го официјализира враќањето на репрезентативецот Андреј Маслинко (27 год, 208 см).

Тој веќе извесно време тренира со „металците“, за кои настапи и во триумфот на овој тим на неодамнешниот меморијален турнир „Андреј Грковски“, а денеска и официјално го потпиша договорот. За крилниот центар ова е враќање во добро позната средина, со оглед што веќе го носеше сино-белиот дрес во периодот помеѓу 2017 и 2020 година.

Маслинко е четврто засилување за МЗТ Скопје за новата сезона, по Андреј Магдевски, Брандон Слај и Милош Копривица. Во тимот се уште Дамјан и Војдан Стојановски, Бојан Крстевски, Марин Петков, Андреј Андоновски, Марко Миловановиќ и Марко Баковиќ. Шампионот новата сезона ја почнува на 24 септември со мечот на домашен терен против Теодо на стартот од АБА2-лигата.