МЗТ Скопје против Работнички, по 167. пат

Вечерва од 18 часот во „Јане Сандански“, тимот од Градски парк гостува кај актуелниот шампион во 167. меѓусебна пресметка. Работнички уште води, со 92-74, но последните години, во кои доминираат во домашната кошарка, аеродромци значително ја намалија разликата. МЗТ Скопје влегува во дербито како освојувач на тројната круна и на последните осум трофеи во домашната кошарка, сметајќи ги сите натпреварувања. 

Првата полусезона од сезоната беше исклучително тешка за двете екипи. МЗТ Скопје кој важеше за голем фаворит во АБА 2, беше елиминиран уште во првата фаза, а во меѓувреме остана и без двајца од четворицата странски кошаркари во тимот. Долго време беше и далеку од врвот, но добрите резултати во последните кола, заедно со поразите на главните конкуренти придонесоа да застане на првото место кое го дели со ТФТ. Од Работнички никој не очекуваше чудо во АБА 2, но и тоа дека овој тим ќе доживее шест убедливи порази во регионалното натпреварување. И тимот од Градски парк имаше кадровски проблеми, од четворицата странци со кои почна, остана само Имран Полутак кој е и еден од најдобрите во екипата. Вечерва се очекува да дебитира Миљан Марковиќ, но по се изгледа нема да игра Џексон Дубински.

Традицијата на меѓусебните дуели е апсолутно на страната на МЗТ Скопје. На последните 11 меѓусебни пресметки, Работнички оствари само една победа и тоа минатата сезона како гостин, но не во „Јане Сандански“, туку во Кисела Вода. Тоа е уште еден фактор кој го прави МЗТ Скопје апсолутен фаворит на овој меч.

Во 14. коло од Првата македонска кошаркарска лига има уште неколку дерби дуели. Освен тоа што се среќаваат чаирските ривали Шкупи и Чаир, во Гевгелија, Кожув ќе го пречека ко-лидерот ТФТ, а МКК Куманово ќе се сретне со вицешампионот Пелистер.

ДВОЈКИ
ДЕНЕСКА
Гостивар - Еуро Никел 17:00
МЗТ Скопје - Работнички 18:00
Кожув - ТФТ 18:00
Феникс - Вардар 20:30
УТРЕ
МКК Куманово - Пелистер 18:00
Шкупи - Чаир 18:00