Кожуф со гостинска победа го прескокна Гостивар на табелата

Гостите од Гевгелија за нијанса беа подобар противник во почетните минути, па по првиот период водеа со 18-26, додека на одмор заминаа со 39-42.

Во второто полувреме Гостивар го врати мечот во егал, а одлучувачка за победата на Кожуф беше последната четвртина.

Тој период тимот од Гевгелија го стартуваше со серија од 9-0 и дојде до предност од 56-62. Домашните до крајот успеаа само да се доближат до „минус два“, но не и да направат пресврт.

Стевановиќ и Пилепиќ со по 22 поени беа најефикасни во редовите на Кожуф, додека на спротивната страна се издвојуваше Дарко Соколов со 16 поени.

На табелата Гостивар сега е на осмата позиција со десет бода, додека Кожуф со бод повеќе е две позиции понапред.