Клубовите бараат итна средба со Антиќ и судиите - плејофот мора да почне!

13 април 2025 - 14:56

Откако викендов не почна плејофот во Првата македонска кошаркарска лига, а запрени се и натпреварувањата во сите конкуренции поради штрајкот на судиите, клубовите побараа итна средба со раководството на КФМ со цел надминуввање на кризата.

Арбитрите одлучија да ги стават во мирување своите ангажмани затоа што не се исплатени од почетокот на оваа година.

„Согласно членот 27 од Статутот на КФМ, како клуб, член на Федерацијата и претседател на Здружението на клубовите од Втората лига мажи, а знаејќи ја ситуацијата во која сме вклучени не по наша вина, односно блокирани се сите првенства во организација на КФМ, бараме итен состанок со сите вклучени страни во овој спор или раководството на КФМ, претседателите на сите здруженија и СК ма КФМ, в понеделник, 14.04.2025 година во 12 часот, со единствена точка на дневен ред - изнаоѓање решение за продолжување на првенствата“, пишува во барањето потпишано од првиот човек на КК Ангели, Благоја Кечовски.

Судиите ѝ дадоа една недела на Федерацијата да ги исплати сите заостанати долгови кон нив и во најдобар случај, првенствата би продолжиле в среда.