КК Маџари го смени името - ќе се вика како шампионот ама без МЗТ и Аеродром!

Клуб со такво име повеќе нема да постои откако колективот од Гази Баба денеска објави промена, па во новата сезона ќе влезе под називот Скопје 2023. Одлуката е објавена на социјалните мрежи каде клубот ги повика фановите од Гази Баба да му дадат поддршка, вклучувајќи ја и навивачката група на Фудбалскиот клуб Скопје..

„КК Маџари се ребрендира во КК СКОПЈЕ – име кое носи препознатливост, традиција и амбиција, но пред сè, име кое го обединува духот на нашиот град и спортската енергија на Општина Гази Баба.

Ова не е само промена на името.

Ова е нов чекор во градењето на една уште поголема и попрепознатлива спортска приказна.

Гази Баба отсекогаш била место каде што се создаваат спортисти, каде што се живее за спортот и каде што младите го учат најважното – дека со работа, посветеност и тимски дух, границите не постојат“, пишува, меѓу другото, во соопштението.

Маџари, односно Скопје, пред два месеца објави дека се сели од својот дом во истоимената скопска населба и како домаќин во Суперлигата и АБА 2 ќе настапува во „Јане Сандански“. Интересно е тоа што во иднина ќе има исто име како шампионот на Македонија со тоа што аеродромци во називот го имаат и својот поранешен спонзор.