Сосед на Седлоски од Прилеп ја извозе Швајцарија за да го бодри Вардар во Лозана (ФОТО)

31 јули 2025 - 18:42

Вардар вечерва ќе ѝ гостува на Лозана во реваншот од второто квалификациско коло на Конференциската лига, а нема да изостане поддршката на трибините каде што освен Комити и нивните браќа од Шалке ќе се најде и еден - прилепчанец.

Станува збор за гастербајтер од Цирих, кој ја извозе Швајцарија (повеќе од 200 километри од еден на друг крај) за да го бодри својот некогашен сосед и пријател Гоце Седлоски, тренерот на Вардар.

„Живеев во исто маало со Гоце и кога слушнав дека со Вардар ќе доаѓа во Швајцарија, немаше шанси да ја пропуштам можноста да навивам за него и за македонската гордост“, ни изјави прилепчанецот.

Гастербајтерите што живеат во Лозана и околината, веќе се организирани и подготвени да бидат 12. играч на Вардар, заедно со навивачите од Скопје. Вардар ќе нема навивачи само од престолнината, туку и од цела Македонија, меѓу кои ќе биде и долгогодишен симпатизер од Ново Село. Тој ни раскажа дека за првпат навивал уште во шампионската 1987 година, кога на стадион го одвел Климе Стоилов – таткото на познатиот ракометар Стојанче Стоилов.

„Од тогаш сум верен на Вардар. Секој пат кога ќе имам можност – доаѓам“, вели тој.

Средбата во Лозана почнува од 20.15 часот. Вардар против силниот домаќин влегува со предност од 2-1 остварена во првиот дуел на скопската Арена.