Русија повторно надвор од европскиот фудбал: УЕФА ја затвори вратата и за Евро 2028!

Руската фудбалска репрезентација нема да биде дел од квалификациите за Европското првенство во 2028 година. Селекцијата на оваа земја воопшто не се наоѓа на списокот на учесници во претстојната ждрепка, со што е потврдено дека санкциите кон руските селекции и клубови продолжуваат да важат.

Одлуката произлегува од официјалната документација на УЕФА за квалификацискиот циклус, а истата информација ја потврдија и повеќе меѓународни медиуми. Генералниот секретар на европската фудбалска централа, Теодор Теодоридис, испратил известување до членките на организацијата, во кое се наведени 54 репрезентации што ќе учествуваат во квалификациите. Русија не е меѓу нив.

Ждрепката ќе се одржи на 6 декември во Белфаст, а селекциите ќе бидат распоредени во 12 групи со по четири или пет учесници. Квалификациските натпревари ќе започнат во март 2027 година и ќе траат до ноември истата година, додека баражите се предвидени за март 2028.

Ова е продолжение на суспензијата што ФИФА и УЕФА ја воведоа во февруари 2022 година, по почетокот на руската воена инвазија врз Украина. Оттогаш руските репрезентации и клубови немаат право да настапуваат во официјалните натпреварувања под покровителство на двете фудбалски организации.

Последиците се сериозни за рускиот фудбал. Сениорската репрезентација ги пропушти Светските првенства во 2022 и 2026 година, како и Европското првенство во 2024 година, а сега ќе го прескокне и квалификацискиот циклус за континенталниот шампионат во 2028 година.

Евро 2028 ќе се игра во Англија, Шкотска, Велс и Република Ирска, а завршниот турнир ќе собере 24 репрезентации. За Русија, меѓутоа, патот до континенталното првенство е затворен уште пред да биде извлечена групната фаза.