Норвешкото чудо во лов по нов скалп, Баерн Минхен „брани“ серија долга 22 години!

Избраниците на тренерот Кјетил Кнутсен лани дебитираа во ЛШ и веднаш стигнаа до осминафиналето, пред да бидат елиминирани од Интер. По успешно минатите квалификации ова лето, норвешкиот состав сега пристигнува во Баварија со намера да докаже дека нивните европски успеси воопшто не се случајност.

Пред норвешкиот претставник стои една од најимпресивните традиции во историјата на европскиот фудбал. Баерн Минхен влегува во овој натпревар со неверојатна серија од 22 последователни победи на отворањето од најсилното европско клупско натпреварување. Дополнително, баварскиот гигант нема претрпено пораз на домашен терен во групната или лигашката фаза од елитното натпреварување уште од декември 2013 година, што јасно ја нагласува тежината на предизвикот со кој се соочуваат гостите. Германскиот тим е исто така непоразен во досегашните осум соочувања со норвешки клубови, со шест победи и две ремија.

Екипата предводена од Винсент Компани и напаѓачот Хари Кејн ја отвора европската кампања со желба да го надмине минатогодишниот пласман, кога беше запрена во полуфиналето од ПСЖ со вкупни 6-5. Баерн веќе зад себе има солиден старт на домашната сцена, триумфирајќи во Суперкупот против Борусија Дортмунд (2-1) и бележејќи високи победи против Штутгарт и Оснабрик, пред викенд-ремито без голови против Шалке.

Денешната програма во ЛШ ја отвораат Фенербахче против Рома односно ПСВ против Шахтар, двата меча закажани за 18.45 часот. Во терминот од 21 часот, освен пресметката на „Алијанц Арена“ има уште еден историски дуел и тоа на дебитантот Комо на домашен терен против Лајпциг, додека Манчестер Јунајтед го пречекува Сабах Баку, а Славија Прага му е домаќин на Ленс.