Арсенал се бетонира на првото место во ЛШ, Реал го одигра најдобриот натпревар сезонава (ВИДЕО)

„Топчиите“ со тоа остануваат единствени непоразени во елитното натпреварување и нема шанси никој да ја стигне нивната гол-разлика, а ако се знае дека во последното коло го пречекуваат аутсајдерот Каират, јасно е дека од првото место ќе го очекуваат својот ривал во осминафиналето. Интер, од друга страна, го претрпе третиот пораз во низа и си го доведе во опасност пласманот во топ-8 што се очекуваше дека ќе биде рутина по победите во првите четири кола.

Арсенал вечерва беше апсолутно подобар тим, а херој на лондонскиот тим беше Габриел Жезус. Бразилецот го отвори резултатот во десеттата минута, а по израмнувањето на Сучиќ, во 31. минута повторно го доведе во водство својот тим. На негово место во второто полувреме влезе Ѓокереш и Швеѓанецот веднаш го искористи за да ги постави конечните 3-1.

Реал Мадрид го одигра својот најдобар натпревар сезонава и го совлада Монако на домашен терен со 6-1. По поразот од Барселона во финалето на Суперкупот и елиминацијата од второлигашот Албасете во Копа дел Реј, ова беше мелем на „кралските“ рани.

Блескаше Винисиус кој постигна еден гол и три асистенции, Мбапе два пати ја тресеше мрежата на својот поранешен клуб, по еднаш погодија Мастантуоно и Белингам, а единнствениот гол за Монако беше дело на Тезе. Во последното коло Реал ќе гостува во Лисабон, кај Бенфика.

Од денешните натпревари, за издвојување е асистенцијата на Елиф Елмас во дуелот со Копенхаген (1-1) и поразот на европскиот шампион ПСЖ на гости кај Спортинг (1-2).

РЕЗУЛТАТИ
Каират - Бриж 1-4
Бодо - Манчестер Сити 3-1
Копенхаген - Наполи 1-1
Интер - Арсенал 1-3
Олимпијакос - Баер 2-0
Реал - Монако 6-1
Спортинг - ПСЖ 2-1
Тотенхем - Борусија 2-0
Виљареал - Ајакс 1-2