Анчелоти: Секој дуел со Гвардиола ми е кошмар и ме боли главата

Тоа ќе биде и нов дуел на двајцата тренери со најголем број победи во историјата на Лигата на шампионите, Карло Анчелоти и Пеп Гвардиола. Италијанецот во моментов е рекордер со 121, а менаџерот на Сити има девет помалку, но нивните меѓусебни натпревари последните години станаа вистинска класика. Со оглед на резултатите оваа сезона, Реал е фаворит, но кој би смеел предвреме да го отпише Сити. Анчелоти не се радува многу на средбата со Гвардиола и признава дека овие натпревари му носат многу главоболки.

„Гвардиола е иноватор во фудбалот и јас имам голем респект кон него. Тој е еден од најдобрите и секогаш ми се кошмар натпреварите со него бидејќи треба да се мисли на многу работи, а во такви случаи ме боли главата. Во последните три сезони, тој што победуваше во нашите дуели, ја освојуваше титулата, уверен сум дека така ќе биде и сега“, рече Анчелоти.

Првиот меч од плејофот се игра утре во Манчестер, а реваншот е на 19 февруари на „Бернабе“.