Си ја заврши работата: Ван Нистелрој испратен со овации (ВИДЕО)

10 ноември 2024 - 17:29

Руд Ван Нистелрој на одличен начин си ја заврши работата во Манчестер јунајтед и тимот под негово водство во четири натпревари запиша три победи и еднаш одигра нерешено.

Освен тоа и гол-разликата од 11 постигнати и три примени погодоци е одличен учинок ако се знае како изгледаа „црвените ѓаволи“ под водство на Тен Хаг.

Но, Манчестер јунајтед сепак не се одлучи да му даде шанса и Холанѓанецот го водеше тимот само до пристигнувањето на Рубен Аморим кој со работа на „Олд Трафорд“ започува од утре.

Дебито на клупата Аморим ќе го има по репрезентативната пауза кога Манчестер јунајтед го очекува натпревар против Ипсвич.