Саудијците го „откачија“ Меси - не може да игра кај нив

Според „RMC Sport“, аргентинскиот фудбалер сакал да потпише краткорочен договор со еден од клубовите во Саудиската професионална лига во текот на зимскиот период, со цел да остане во натпреварувачки ритам. Сепак, локалните власти и клубовите експресно ја отфрлиле оваа можност. Причината е јасна - саудиската лига не сака да стане привремена дестинација за странски ѕвезди, туку се стреми да изгради сериозно и конкурентно натпреварување кое ќе им конкурира на најсилните европски лиги.

Во овој контекст, отфрлањето на предлогот на Меси се толкува како принципиелен потег што покажува дека Саудијците не сакаат да бидат само „тренинг“, дури ни за еден од најдобрите фудбалери на сите времиња. Одбивањето на Саудијците доаѓа во период кога земјата инвестира многу во спортот, особено во фудбалот, привлекувајќи имиња како Кристијано Роналдо и Карим Бензема.

Меси последните две години игра за Интер Мајами и досега постигна 73 гола и запиша 37 асистенции на 83 натпревари. Неодамна тој го продолжи договорот со клубот од Флорида до 2028 година, што значи дека планира да игра и во петтата деценија од животот. Неговата моментална пазарна вредност е околу 18 милиони евра, што е сè уште импресивно за играч во доцните фудбалски години.