Рушење рекорди: Шпанија до финалето на Мундијалот стигна со - историска серија!

Актуелниот европски шампион ја продолжи фантастичната серија без пораз на 37 натпревари, со што го израмни рекордот на Италија за најдолга низа без загубен меч меѓу европските репрезентации. „Црвената фурија“ со ова само потврди дека е еден од главните фаворити за светската титула, а бројките дополнително го потврдуваат тоа.

Дури петмина шпански репрезентативци никогаш не доживеале пораз на Светско или Европско првенство - Ајмерик Лапорт (22 настапи), Микел Ојарсабал (20), Фабијан Руиз (16), Микел Мерино (14) и Ламин Јамал (14). Посебно се издвојува неверојатната статистика на ѕвездата на Барселона, која сè уште нема пораз во дресот на Шпанија, а на Светските и Европските првенства стартувал на 12 натпревари и на сите 12 неговата репрезентација победила.

Шпанците испишаа и уште еден историски рекорд, станувајќи првата репрезентација во историјата на Светските првенства која на еден турнир успеала да ја сочува својата мрежа на шест натпревари. Импресивна е и дефанзивната статистика против Франција. Пред полуфиналето, очекуваниот број голови што им беше дозволен на противниците изнесуваше само 0,3 – најнизок показател на едно мундијалско полуфинале уште од дуелот меѓу Бразил и Шведска на Светското првенство во 1994 година.

Покрај бројките, интересни се и неколку традиции кои сè уште се актуелни. Освојувачот на „Златната топка“ никогаш не станал светски шампион во истата година, па Франција со Осман Дембеле ја заврши авантурата во полуфиналето. Во пресрет на второто полуфинале меѓу Аргентина и Англија постојат уште две интересни статистики. Досега ниту една репрезентација предводена од странски селектор не ја освоила светската титула, што не оди во прилог на Англија и Томас Тухел. Од друга страна, ниту една селекција која го започнала Мундијалот како прва на ФИФА-листата не успеала да стане светски шампион, а токму тоа е случај со Аргентина.