Португалците се збогуваа со Роналдо и порачаа: Нема да дозволиме да заминеш само така!
Иако можеби не беше целосно неочекувано 41-годишниот напаѓач на Ал Наср да се повлече од националниот тим, сепак, неговата одлука изненади многумина. И покрај несогласувањата со селекторот Жорж Жезус, се очекуваше Роналдо повторно да го облече репрезентативниот дрес.
Сепак, само еден ден пред селекторот да го објави списокот за натпреварите во Лигата на нации против Данска и Велс, Роналдо преку видео на социјалните мрежи соопшти дека ја завршува репрезентативната кариера.
„Фудбалскиот сојуз на Португалија нема да дозволи Роналдо да замине без почести. Нашата искрена желба е да организираме настан кој ќе претставува признание достојно за неговата исклучителна кариера. Сакаме навивачите и целата земја да имаат уште една можност да му аплаудираат и да го прослават играчот кој ни подари толку многу“, се наведува во соопштението.
Засега не се откриваат детали за тоа како ќе изгледа церемонијата, но од Сојузот испратија и емотивна порака до фудбалерот на Ал Наср, изразувајќи му вечна благодарност.
„Повеќе од врвен спортист, нашиот капитен беше инспиративен лидер, пример за посветеност и најголем симбол на духот на нашата репрезентација.
Неговата легендарна кариера е обележана со 234 натпревари и 146 постигнати голови. Како капитен, ја носеше својата земја на плеќите, рушеше рекорди и го предводеше тимот до успеси и моменти кои засекогаш ќе останат запишани во историјата на португалскиот фудбал. Секоја капка пот, секој решавачки гол и секое носење на капитенската лента беа одраз на неговата безусловна љубов кон репрезентативниот дрес.
Неговата посветеност и наследство ги надминуваат границите на фудбалскиот терен. Кристијано Роналдо го прослави името на Португалија и инспирираше генерации млади луѓе кои сонуваат да тргнат по неговите стапки. За многумина од нас, тој е најдобриот фудбалер на сите времиња!
Ти благодариме за сè, капитене! Ова засекогаш ќе биде твојот дом! Одиме по 1.000. гол!“, порачаа од Фудбалскиот сојуз на Португалија.